Thursday, May 17, 2007

عض رغيفى ولا تعض كلبي

أن تجد من يقدر كم المشكلات التى تعانى منها فهذا أمر مبشر ويدل على ان الدنيا لسه بخير .. وأن تجد من لا يقدر مشكلاتك فهذا أمر طبيعي لحد كبير فالناس اتغيرت ومحدش بقى بيخاف الا على مصلحته .. اما ان تجد من يتجاهل اثقل همومك ويذكر مشكلة سطحية لا تعنى حياتك ومستقبلك ويطالبك بحلها فهذا امر لا يستوعبه عقل , فمثلا فكيف نطالب شخص بدفع فاتورة كهرباء وخدمة الكهرباء لا تصل إليه .. كيف اطالب بتركيب تكيفات فى شقق الشباب والشباب مش لاقى اصلا شقق على قده .. وكيف يكون مطلوب منى ان اهتم بصحة الكلاب الضالة وغيرى لا يستطيع علاج ابنه او ابوه او امه ويسعى للحصول على قرار علاج على نفقة الدولة
ازاى اصلا فيه ناس بتفكر فى الحيوانات ومشاكلهم وتتجاهل مشاكل الانسان هى الناس دى بتفكر ازاى
أرسلت النجمة الفرنسية بريدجيت باردو _ رئيسة منظمة لرعاية وحماية الحيوانات _ رسالة إلي الرئيس مبارك تعاتبه فيها على الوضع غير الآدمي للكلاب الضالة التي تعيش في شوارع مصر المحروسة فهي تتعرض لمخاطر صحية تؤثر بالسلب على صحتها ويؤدى فى النهاية إلي التخلص منها بطريقة تقشعر لها الأبدان وذلك بالسم أو القتل بالرصاص ... وطالبت مبارك بوقف تلك المجازر الحيوانية التى يشهدها الشارع المصري بشكل يومي فالكلاب كانت فى الأمس البعيد لها احترامها اما الان يتم اهانتها بواسطة المصريين وبتواطؤ من الشرطة المصرية , ووصفت بريدجيت من يستخدمون الطرق البشعة للتخلاص من الكلاب لا يملكون الحد الادنى من الرحمة والانسانية
بعد ما سمعت عن الرسالة اصابنى الهلع .. معقول هى دى صورة مصر فى اوربا والدول المتقدمة , ازاى مصر بلد الاهرامات ,بلد السد العالى , بلد النادى الاهلى تالت العالم تكون هى دى صورتها قدام منظمات حقوق الحيوان .. لازم ناخد خطوات جادة لنفى هذه الشائعة المغرضة حان وقت الاهتمام بكلابنا وترك مشاكلنا مش مهم ناكل عيش مش مهم نتعلم تعليم كويس مش مهم نتعالج مش مهم نتجوز ونسكن فى شقق مش مهم نشتغل مش مهم نقف مع مشكلة اخوانا فى فلسطين والعراق مش مهم اى حاجة , المهم الكلاب تعيش

9 comments:

Anonymous said...

السلام عليكم و رحمة الله وبركاته
انا اصلا مش عرفا مين اصلا اللى جايين يتكلموا على الوحشية وعدمم وجود الرحمة , هوه للدرجة ديه بقى الانسان ميساويش حاجة جنب الحيوان , وصل التقدم فى البلاد ديه للدرجة اللى مش شايفين فيها المجازر اللى عملنها فى اطفالنا فى العراق وفلسطين وشايفين بس الكلاب الضالة اللى فى شارع الهرم 0
زمن العجائب
ولاء

Anonymous said...

MARIAAM
awlan: ana mabhora be el fekra we 3gabany gedan we yaba7'tak enk la2et elly te2dar tetla3 feh elly gwak (tet7esed y3ny )
sanian: badef lemwdo3ak fondo2 el kelab elly b2a a7san mn fondo2 el ameeer
salesan:ya ret tewa3y eman 3ashan de mn el nas elly mahbola be el kelaaab we nefsaha fe wa7eeed
we bas keda

Amr Mohy said...

الناس هناك شايفين وفاهمين كويس ايه اللى بيحصل عندنا سواء فى مصر خاصة والشرق الاوسط عموما لكن هم عندهم مبدأ اللى تفهم فيه اتكلم فيه .. يعنى الست النجمة دى اخرها تفهم فى الكلاب وبتحب الكلاب قامت عاملة جمعية لحماية الكلاب على مستوى العالم ومعجبهاش حال الكلاب المصرية فحبيت توصي الريس عليهم لان كلمته مسموعة فى البلد , هى بقى ملهاش دعوة مين مات ومين مش لاقى ياكل هى كل اللي يهمها الكلاب وبس ..

طبعا الناس فى اوربا وصلوا لكده لان البشر واخدين حقهم تالت ومتلت هناك فالدور بقى على الحيوانات لازم يهتموا بيها ويحافظوا عليها فعملوا جمعية لحماية الكلاب والقطط والخرفان والبقر وووو وجمعية لمقاومة اكل اللحوم والحفاظ على حق البقر فى حياة كريمة

عندنا مفيش الكلام ده لان الانسان لسه مخدش حقوقه كاملة فالبتالى الحيوانات مش احسن مننا زى ما احنا تعبانين يتعبوا معانا :)

نقطة مية said...

يا عم انت زعلان ليه ما احنا في زمن مقلوب يا بخت الكلاب عقبال ما نلاقي حد يدافع عننا زيها خلي نفسيتك حلوة و بلاش نفسنة الناس تستحمل تعيش في الشارع اما الكلاب ..تؤ..حرام
:-)

Amr Mohy said...

مين قال انى زعلان ولا بحقد على الكلاب .. لا طبعا الكلاب مهما كان جزء من بلدنا عايشين واكلين شاربين من خير البلد والخير اللى هيعم عليهم اكيد هيعم علينا :)

Anonymous said...

هااااااااااااااى
انا يا عمرو زعلانة منك اوى يعنى ازاى انت لسةو عايش فى زمن التفكير المتخلف دة طبعا يا ابنى الكلب اهممممممممم من اى انسان فى الشارع والدليل على ذلك ان كلاب وقطط السيد الرئيس العظيم بتاعنا بيجلهم الاكل من الخارج على طائرات خاصة........ يا عينى على الانسان الغلبان الى مش لقى اللقمة الى ياكلها وبعدين السيت الحاجة دى بتاعت حقوق الحيوانات مش شافت الناس لية فى الشارع قبل لما تشوف الكلام الى بيتقتلوا بالرصاص او بيتسم
انا واللهى لو كنت اعرفها كنت عزمتها على اى سجن ولا معتقل عندنا تشوف بس بيعملوا اية مع البشر مش الحيوان ولا نروح لية لبعيد نوديها اى قسم شرطة وهى هتعرف الباقى كلة
يلا انا بس حبيت اقولك انا احنا اصبحنا فى زمن الاحيوانات فيها اغلى من البشر اصلا
منوننن

Anonymous said...

يا ساتر عليك ايه الحقد ده طب ما تسيبهم يمكن يعرفوا يخذوا حقوقهم هى الكلاب ده مش برده من حقها انها تعيش حياة كريمة،ومين عارف مش يمكن لما يخذوا حقوقهم ناخذ احنا حقوقنا من منطلق يعنى تحقيق المواطنة والمساواة والعدالة الاجتماعية
الموضوع ده فكرنى بخبر قراته قبل كده فى الاخبار فى صفحة الحوادث مضمونة ان سيدة المانية قدمت بلاغ بتتهم فيه المسئولين عن نظافة شوارع المعادى بانهم المسئولين عن موت كلابها الاربعة لانهم اكلوا من الشارع، طبعا كلابها متربية على الغالى علشان كده معتدهم ما استحملتش.. امال بقى حتقول ايه لو عرفت ان عندنا اطفال ما بيكلوش غير من زبالة الشارع.. ولا عزاء لأطفال الشوارع

Anonymous said...

yaa ya 3amr tsdk el set deh btfhm w b3den l3lmk l klab deh awf2 mn el ensan nfso
dah ana nfsy f klb mooooot w l3lmk ana bfakr nktr7 fekrt klb lkol mwatn bdl ma klbna moshrda kda ya 7ram
w hnb2a e7na w el klab mostfeden e7na mn n7et hnl2y 7d mo7`ls nfdfdlo mn 3`er 7`of w homa el klab e3ny hel2ao akl w shorb w s7thom htb2a 3aaaal awy
w l3lmk elly be2ol klab el re2s btegy aklha mn bra w eh e3ny e7na kman klbna htakol mn bra l2n e7na f msr mfesh 7aga feha 3`er mn bra e3ny mfre2tsh kolha mnzra w 7`las

Amr Mohy said...

بحبك يا مصر :

بكرر انى مش بحقد على الكلاب عشان محدش يحاكمنى بتهمة العنصرية ومعاداة الهوهو لكن كل اللى مضايقنى ان ليه الناس بتوع التشرد الكلابي شايفين شغلهم كويس ومهتمين بصحة كلاب مصر وقلبهم على صحتهم .. وفى نفس الوقت الناس بتوع التشرد الانسانى عايشين فى عالم تانية شغالين بس فى مؤتمرات وندوات وتصريحات ووعود والانسان زى ماهو متشرد ومحدش سأل فيه