Tuesday, May 15, 2007

بوحة فيديو جيم .. يـــــــــاحلاوة



ياشعب مصر ابشروا بوحة بقى فيديو جيم ... اللعبة هتكون اكشن بيعارك بوحة فيها ولاد ابو اسماعيل بس بدل ما يكون سلاحك بازوكا او sniper او shot gun هيكون سلاحك الشومة وبدل ما تركب دبابة او عربية مصفحة هتركب ميكروباصات رمسيس رمسيس أخر الشارع .. وهتعارك صعايدة وفلاحين بدل البودى جاردات والمارينز زى ما كنا بنشوف فى الالعاب الامريكانى ..

كده بقى لما الام او الاب يقولوا لابنهم يابنى ادخل ذاكر سيبك من بوحة مش هينفعك فى الامتحان هنلاقى الواد طلع ساطورين ولا اجدعها جزار ويقولهم صبح صبح ياعم الحج الامتحان في جيبنا سيبونا نكمل المرحلة فاضلي راسين من ولاد ابو اسماعيل وبعد كده هعارك اسماعيل نفسه وابقى كده قفلت اللعبة ...

طبعا هنلاقى اللي يهاجم اللعبة نفسها ويقول دى هتبوظ اخلاق ولادنا وهتعلمهم الالفاظ وانهم يتكلموا زى بوحة ... وهينسوا ان اصلا كل الالعاب الامريكانى كله دلوقت مسيطر عليها طابع العنف والجنس والمخدرات والغش والشتايم بألفاظ بشعة بس طبعا محدش واخد باله لان بيشتم بالانجليزى وطبعا اغلبنا عارف لعبة (جى تى اه) اللعبة دى هدفها ليس الا تنفيذ جرائم مقابل اموال ومفيش مانع انك تدلع نفسك وانت ماشي فى شوارع امريكا بكل اللى تتخيله .. اللعبة دى بتعمل الاطفال امور وطرق حياة لا تتناسب مع حياتنا فى مصر ولا تقاليدنا والمشكلة ان الاهالى ولا واخدين بالهم ان الاطفال بينزلوا يروحوا للنت كافيه مخصوص عشان يلعبوا اللعبة دى بالساعات .

واحنا شعب بيحب الظيطة هنلاقى وسط الهجوم على اللعبة لعبة تانية لفيلم تانى وتالت ورابع وخامس فالموضوع هيتحول لموضه كل هيقول اشمعنى فيلم فلان اتعمل لعبة وانا لا .. هنلاقى لعبة باسم سوبر برعي لأحمد حلمى ... ولعبة فتوة الحارة لأحمد السقا ... ولعبة هبلولى لمحمد هنيدى ... وهتبقى الالعاب دى مادة لترويج الفيلم ووسيلة اعلانية ومصدر ربح جديد للمنتجين .. وتبقى مصر صاحبة الريادة فى صناعة الفيديو جيمز ومستواها يتحسن والاقتصاد ينتعش وهناكل اللحمة والبوفتيك ... عمــــــــــــــــــــار يامصر

4 comments:

JuSt_hUmAn said...

ماشي يا عم عمرو اللعب الأمريكاني فيها بوظان و منها لعب بيبقى بطل اللعبة بيحارب العرب كمان !
بس مش بوحة هو الحل يعني..
حزب الله كان أنتج لعبة مشابهة من سنة تقريباً..لعبة عربية بطلها عربي و بيحارب اسرائيل..مش احنا بنعمل بوحة !
طبعاً لعبة حزب الله ما لاقيتش نجاح كبير و أنا نفسي عمري ما شفتها ولا سمعت عنها غير من خبر صغير في الدستور..لكن المفروض الحاجات دي يتصرف عليها بذمة شوية عشان كمان خمس سنين نقدر نعمل حاجة عليها القيمة.
الألعاب دي لها دور كبير جداً في تنشئة الأطفال و زرع حاجات كتير قوي جواهم..ليه ما نستفيدش من حاجة زي كدا و نزرع فيهم أفكارنا عليها القيمة؟
مش نزرع فيهم صبّح صبّح يا عم الحاج!

Amr Mohy said...

انا مش بقول أن لعبة بوحة هى الحل عشان نواجه بيه الغزو الامريكى لعقول الاطفال لكنى بقول بلاش نشوف ناس عمالة تزعق وتهاجم اللعبة وتتهمها انها سبب فى فساد اطفالنا لان اللعب اللى تفسد اخلاق الاطفال موجودة من الاول ومحدش عارف يمنعها او يضع عليها رقابة .. ولا هو على رأي المثل مقدرش على الحمار فاتشطر على البردعة ..

اللعبة اهي محاولة من محاولات اننا نبتكر لعبة عربية لكن موضمونها عليه تحفظات والمضمون تم اختياره لاسباب تجارية بحته تساعد الشركة على انتاج لعب أخري سواء لعب على نفس مستوى المضمون او لعب مضمونها ارقى من كده .. لكن ياريت نعمل حاجة جديدة غير الاعتراض والهجوم وهو اننا نقوم بخطوة عملية سواء بمنع الالعاب ووضعها تحت الرقابة أو العمل على انتاج لعبة عربية ليها هدف وينمى فكر الطفل المصرى والعربي

JuSt_hUmAn said...

مهو أنا مافيش في ايدي حاجة غير إبداء رأيي..لا أعرف أعمل لعبة ولا أعرف أعمل رقابة على الألعاب!

Amr Mohy said...

انا عرضت الموضوع ده ليس لمهاجمة اللعبة ولا تأييدها لكونها لعبة مصرية انا عرضتها لكى اظهر كم اننا شعب متعارض فى آرائه وتصرفاته .. ففي الوقت اللى اللى تتعرض له اللعبة لهجوم عنيف من النقاد وأساتذة علم الاجتماع والنفس هنلاقي هناك توسع وانتشار لهذه النوعية من الالعاب وهتحقق أرباح كبيرة كمان