Sunday, May 20, 2007

فرحة أول العنقود


دائما كان ابي وامي يرددون مقولة ( انت مش حاسس بقيمة الحاجة لانك متعبتش فيها ) .. لم اشعر بمعنى هذه الجملة الا بعد أن عشت بتجربة مشروع التخرج لشعبة الصحافة فى قسم الاعلام بجامعة عين شمس فبمجرد أن استلمت اول نسخة للمجلة بعد انتهاء عملية التجليد شعرت انى أحمل بين يدي أولي بناتى وليس مجرد مجلة عبارة عن ورق .. اسمها "صورة" صورة كبيرة تعكس واقع نعيشه ونأمل فى تغييره للأفضل
كانت مهمة صعبة جدا تتمثل فى اخراج مجلة شارك فى تحريرها 93 طالب بحيث تكون متنوعة الموضوعات وصاحبة شخصية ثابتة على مدار صفحاتها واتمنى ان اكون قد وفقت مع زملائي واصدقائي من هيئة تحرير المجلة فى تحقيق المعادلة الصعبة وإخراج المجلة فى شكل يليق بنا كطلاب اول شعبة متخصصة فى الصحافة بقسم الاعلام
بجانب انى عشت تجربة جديدة استفدت كثيرا منها .. انا اتقربت اكتر من اصدقائي نتيجة اننا كنا بنشوف بعض اكتر ما كنا بنشوف اهلنا وتعاملت مع معاهم فى مواقف مختلفة فيها غضب وانفعال ودوشة وفرحة وبطئ فى العمل وسرعة فى الاداء وعتاب , واتمنى ان معرفتنا ببعض تستمر بعد التخرج ونكون مع بعض دايما فى الحلوة والمرة
مدحت العطار و منه صلاح الدين وولاء ابراهيم وريهام رأفت مبروك عليكم مشروعنا والى الامــــــــــــــــــام دائما
انا فرحان جدا حاسس كأنى فرحان فرحة اول العنقود

18 comments:

Anonymous said...

MARIAM
abo el bnaat mabroooooooooooook
wlahy te3ebnalaaaak bs law kant 7alet welada bgad kant 7'lset abl el mglaaa...3la el 3mooom mabroook we bgad el ketab biban mn 3enwanoo we el mgla baina mn 3'olafhaaa shklha 7'ateeeeeeer we shkl mawdo3atha 7lwa awee we da7'ma kman 3o2bal ma tetwaza3 3aleeena b2aa

Anonymous said...

السلام عليكم يا عمرو
انا كمان حاسسه نفس احساسك بالضبط وفرحانة اوى اننا الحمد الله خلصنها بعد كل التعب والقرف والخناقات الى شوفنها واحنا بنعمل المجلة وكمان انا مبسوطة اوىىىىىىىىىىىىىىىىىىىىىىى انا المجلة جمعتنا انا وانت ومدحت ووولاء اوى اكتر من الاول بكتير جدا وكلنا اكتشافنا حاجات جديدة فى بعض وبقينا اصحاب اكتر بكتير من الاول وانا مبسوطة بموضوع دة اوى اوى اوى
ويا رب كلنا نبقى فخورين بالمجلة وبشغلنا عشان احنا تعبنا اوى وانتى بجد التوفيق فى الجوائز لينا كلناااااااااااااا
منة صلاح الدين

young pharaoh said...

عمروووووووووووش بك الف مبروك يا كبيرنا ويارب ما تكونش زعلان منى لانى عارف انى ساعات بتعصب وكده بس انت اجدع منى وبتستحملنى ... والله يا ابنى الصورة دى تعبتنا اوى بس بارب ربنا يكرمنا وتكون بداااااية لمستقبل فيه الخير

اخوك الصغير مدحت العطار :)

Anonymous said...

السلام عليكم ورحمة الله وبركاته
بجد انا مش قادرة اوصف انا فخرورة ازاى باللى احنا عملناه وفخورة اكتر بانى كسبت اصحاب انا بجد معرفتهمش بجد غير فى المشروع ، انا اكتشفت فيهم صفات معرفتهاش غير لما اتحطينا مع بعض فى مواقف كتير فى الاهرام المكان الى شهد بجد تعب و فرح وزعل فى بعض الاوقات و كمان صداقة اتمنى انها تستمر ، كل الى اقدر اقوله انى لاقيت فى كل واحد فيهم صفات كتير اوى جميلة ، لاقيت فيك يا عمرو الطيبة انت بجد انسان طيب اوى وجدع اوى اوى ، ومدحت حسيت بجد رغم انه فى نفس سنى انة اخويا الكبير حسيت انه بيخاف علينا بجد وكان على طول ينصحنا ، اما منه بقى فى رغم انى كنت اعرفهه من زمان بس بجد قربنا من بعض اكتر وبجد منه حسيتها بقت زى اختى او انتمتى فى وقت قصير اوى انا بجد مش لاقيه حاجه اقولها عنها ، انا بجد مش ببالغ فى كلامى عنكم وان كان اللى قولته اقل بكتير من اللى تستحقوه
ربنا يديم علينا الصداقة ديه ويكرمنا فالمشوع على قد ما تعبنا فيه
ولاء

زحل الفلكي said...

الف الف مبرووووك وعقبال المشروع الحقيقي في الحياه العملية

بجد فرحة جميله انك تشوف نتيجة تعبك وتكون ناجحة

Amr Mohy said...

mariam :

مكنش يهمنا قد ايه تعبنا بقدر رغبتنا الكبيرة اننا نعمل حاجة كويسة في اول تجربة عملية لينا .. طبعا مكنتش اعمل مرة نعمل موضوعات بس كانت اول مرة نشيل هم مجلة بحالها

نورتى المدونة يامريم


منه صلاح الدين :

منه انتى من الناس اللى استمروامعايا من سنة اولى لحد دلوقتى وان شاء الله تستمر صداقتنا لاخر العمر ... ألف مبروك عليكى مشروعك

مدحت العطار :

رغم انك فى الاخر طلعت ضحية الصراع بين الخير والشر واصبحت تلقب "ببن لادن مجلة صورة " لان اى عملة تحصل الدكتور يقول مدحت مفيش غيره وانه انانى ومغرور ... بس سيبك المهم عملنا اللى عايزينه والاهم اننا فرضنا شخصيتنا على ابو سمرة الفولالى :) .. مبروك ياميتو مشروعك

ولاء :

دايما تقولى عليا انت تحفة يا عمرو لغاية ما حسيت انى مكانى الحقيقى هو المتحف مش البيت :) .. بجد يا ولاء انتى من الشخصيات اللى اكتشفتها فى المشروع طلع دمك خفيف ومرحة وطيبة وصحفية جامدة كمان مع ان الاول كنت واخد عنك فكرة انك كئيبة ودايما زعلانة بس رغم كده كنت بحب اغلس عليكى فاكرة مقلب الورد اللى كان بيقع على راسك من فوق الشجر مش هنسي المقلب ده .

Amr Mohy said...

زحل الفلكى :

اولا نورتنى بزيارتك الجميلة

ثانيا... الله يارك فيك ودايما تكون معانا فى الفرح ان شاء الله

Anonymous said...

شفت ياعمروان دايما الانسان مبيشعرش بقيمة الشي الالو تعب فيه مبروك وعقبال باقي الاماني

Amr Mohy said...

قلوب حائرة :

الله يبارك فيكى ويارب نكون كلنا دايما بخير .

قلمي الحر said...

السلام عليكم
مبروك , وعقبلنا احنا كمان السنة دي عندنا مشروع تخرج قسم صحافة في كلية الاعلام , والنسخ اخر يوم الامتحانات ربنا معنا و ومبروك

Anonymous said...

مبروك يا عمرو الف مبروك

فعلا الواحد ما بيحسش بقيمة الحاجة الا اذا تعب فيها ، واجمل ما فى مشروع التخرج العمل الجماعى رغم الخلافات اللى بتحصل بس بتقدر فعلا تعرف الناس اكتر وبتشوف الناس بشكل جديد

وعقبالنا يار ب لما مشروعنا يخلص بالسلامة ، وما تنساش تشيلى نسخة من صورة

Amr Mohy said...

بحبك يامصر :

الله يبارك فيكى .. وان شاء الله كلنا نفرح بتخرجنا ومتخافيش نسختك فى الحفظ والصون

Ayman Elsherbiny أيمن الشربيني said...

مبروك مشروع التخرج بتاعكوا، وعقبالنا إحنا كمان

فعلا شعور رائع انك تطلع المجلة اللي اشتغلت فيها كتيير وبذلت فيها جهد عظيم، بتحس فعلا أن نتاج عملك وجهدك كانه ابنك بالضبط، كانه فرحة اول العنقود زي ما كتبت في العنوان

ربنا يوفقك انت وزمايلك، ويوفقنا احنا كمان ان شاء الله

Amr Mohy said...

sherbiny:

الله يبارك فيك .. فعلا مش قادر اوصف قد ايه هى فرحتى اول ما مسكت المجلة , الحمد لله تعبنا جه بفايدة

وان شاء الله مشرعك يخرج فى احلى شكل انت بتتمناه .. وعقبال الشهادة الكبيرة والتخرج

Dina Samaha said...

اولا انا حاسة بكلامك جدا لانى انا كمان عندى مشروع تخرج بس ولادة متعسرة شوية
:D
يعنى لسه مفرحتش بالمجلة فى ايدى لحد دلوقتى واكيد بشاركك الاحساس ده ان الواحد بيتعب والاخر بيفرح بنتيجه تعبه بين ايديه كفرحة المولود الاول
الف الف مبروك وعقبالنا

ثانيا انا مبسوطه جدا باسم المجلة (صورة) اولا عجبنى جدا لانى من هواة التصوير والاسامى دى وكان نفسى اعمل مجلة اسمها كادر او لقطة وهى مجلة مصورة بس طبعا ليس كل ما يتمناه المرء يدركه بس فرحت ان فيه مجلة اهو شبيه بالاسم اللى كنت عايزاه
:)

Amr Mohy said...

dina samaha :

الله يبارك فيكى ... وان شاء الله مشروعك يخلص علي خيــر من غير اى مشاكل :)

بالنسبة للاسم فمش انا صاحب الاقتراح لكن بأمانة او ما سمعت الاسم عجبنى جدا وتمسكت بيه مع زملائي

شكرا ليكى ونورتينى بالزيارة :)

Anonymous said...

مبروووووووووك يا عمورة انا شفت المجلة وماشاء الله شكلها جامد اوى ومستنية اقراها قريب ان شاء الله وبجد مشروع التخرج ده علمنا كلنا الصبر لحد مانطلع حاجة كويسة وبالتوفيق ان شاء الله فى الجوايز مبروك ليك ولمنونة وولاء ومدحت وكل اللى اشتغلوا معاكو
وتكون صورة بداية لحياة متألقة فى الصحافة واشوفكو كلكو صحفيين كبار وعمرو رئيس تحرير
منة احمد

Anonymous said...

اهلا شباب عين شمس
انا طالبة في اعلام القاهرة
.... انا اطلعت على المجلة وعندي ليم رسالة
الاول الف مبرو على ظهورها الي ارض الواقع
ثانيا .. بالنسبة لتعليقي من وجهة النظر المهنية ... المجلة بيها اخطاء فاحة ... لا تقبل ان تكون مجلة منشورة في لسوق الصحفي .. اولها هو حجم المجلة والعدد الكبير من الصحفات .. لأن القارئ العادي الذي يذهب لشراء مجلة لا يقبل بكل هذه ... فأنا ارى انها تشبه الكتاب
ثالثا ... انا شايفة انه الجهد الكبير اللي بتتلموا علية دة لا يسوى شئ على الععد اهائل المشارك في اصدار هذه المجلة فلا اعتقد ان اصدار صورة صعب على عدد ساوي نصف دفعة اداب اعلام عين شمس ...
رابعا ... المجلة تفتقد التخصص
خامسا .. هنا مواضيع متفبركة اوي ... اشهرها حوار شريهان ؟؟!!! فالجميع استنروا هذه الفبركة ... التي لا تجب ان تكون من قبل طالب يقف على اعتاب بلاط صاحبة الجلالة
وشكرا ليكم جميعا ...
واتنمى من الله ان يوفقكم في اعمالكم الصحفية القادمة
وعلى فكرة انا ببدأ في مشروعي السنة دي ... ادعولي:)
اية امان