Wednesday, May 23, 2007

ولا عزاء للطلبة



وسط الأحداث المتتالية التي تشهدها الساحة العربية سواء المتعلقة بأعمال العنف داخل فلسطين و العراق ولبنان أو مشكلة الجسر البري الذي يربط بين مصر والسعودية .. جذب انتباهي خبر صغير فى الصفحة الأولي لجريدة الجمهورية بتاريخ (21 - 5 -2007 ) يعلن فيه عن فتح كليات الهندسة والحاسبات لطلاب علمي علوم ويبطق القرار على طلاب المرحلة التانية للثانوية العامة العام الحالي .. وده معناه ان نتسيق القادم كليات الهندسة والحاسبات سيكون متاحا لطلاب علمى علوم لاول المرة

مش عارف ليه أول ما قريت الخبر ده شعرت بالإحباط , ايوة فعلا حسيت انى اتظلمت واختى كمان اتظلمت معايا وحسيت ان فيه ناس كتيــــر اتظلموا و هيتظلموا بالقرار ده خاصة طلاب علمي رياضة .. منذ أربع سنوات نجحت فى الثانوية العامة بمجموع 91 % ورغم ذلك لم انجح فى الدخول لكلية الهندسة لان الحد الادني توقف عند 92.8% رغم ان اصدقاء لى دخول نفس الكلية قبلي بعام وبمجموع 89 % .. العام الماضي اختى نجحت فى الثانوية العامة علمى علوم بمجموع 94.5 % وطبعا لم تلتحق بكليات الطب ولا الصيدلة ولا التمريض حتى وفى نهاية المطاف دخلنا كلية الاداب قسم اعلام

المعروف ان كليات الهندسة والحاسبات مجموعها كل عام بيزيد ومش عارف اخرت الزيادة ايه .. الزيادة دى كانت بتحصل عندما كانت مقتصرة على طلاب علمى رياضة فقط فماذا سيحدث عندما ينضم طلاب علوم لفئة المرشحين لكليات الهندسة والحاسبات ؟؟ اكيد مجاميعها هتضرب فى السما لان الاقبال وعدد الطلاب هيزيد بشكل كبير حتى لو تم زيادة عدد الطلاب المقبولين فى جميع كليات الهندسة والحاسبات فى مصر .. فى المقابل سنجد ان كليات الطب والصيدلة والتمريض مجموعهم انخفض بشكل طفيف ولا يذكر وهذا شئ طبيعي في مصر _فالاسعار عندما ترتفع لا تعود لطبيعتها مرة اخرى رغم وعود الحكومة _ كذلك هي مجاميع مكتب التنسيق

السؤال هو متى تم مناقشة ودراسة هذا القرار الذي خرج للنور فجأة كـأمر واقع امام الطلاب وأولياء الامور و دون مراعاة للنتائج السلبية للقرار .. ولماذا لم يتم بدء العمل به من العام القادم بحيث يكون كل طالب عامل حسابه .. وايه ذنب الطلاب فى الاعوام السابقة حصلوا على مجاميع عالية فى شعبة علمى علوم لكن لم يحصلوا على مجاميع الطب والصيدلة العالية جدا جدا وايضا لم يكن لهم حظ فى الاستفادة بهذا القرار وفى نهاية المطاف دخلوا كليات تجارة او اداب او حتى كليات خاصة ولا هم ولاد القطة السودة , طب ازاى طلاب العلوم يدخلوا هندسة وهم مدرسوش رياضة 2 طب طلاب علمى رياضة هيدخلوا كليات الطب والصيدلة ولا لا ... وكمان ازاى خبر مهم بالشكل ده له تأثيره الكبير على قطاع كبير من الشعب المصري وهم طلاب الثانوية العامة واسرهم يتم نشره فى خبر لا يتعدى مساحته 6 سم وعلى عمودين ؟؟؟

القرار ده مثله مثل قرارات عشاوئية كثيرة تمت بدون دراسة كافية واللى دائما تساعد على اشتعال الدروس الخصوصية لان الكل سيسعي للحصول على اعلى المجاميع لضمان الالتحاق بكليات الهندسة والحاسبات سواء علمى علوم او علمى رياضة .. عند التفكير فى وضع حلول لمشكلة الثانوية العامة يجب ان يكون الحل هو تغيير جذري وليس تغيير سطحي !


القرار ده ممكن يكون فى صالح طلاب علمى علوم ولكنه سيكون عقبة وظلم كبير لطلاب علمى رياضة

22 comments:

Anonymous said...

السلام عليكم
ازيك يا عمرو
انا ياعمرو كنت زيك كدة بردو كنت علمى علوم وجبت 90% وبردو دخلت فى الاخر اداب اعلام وانا شايفة اساسا اننا مش عندنا من الاصل نظام تعليم عدل نمشى علية ونفسي افهم يعنى بمناسبة اية واحدبيدرس احياء وكمياء وفزياء يدخل هندسة وحاسبات هو اى هبل وخلاص عشان الناس بتوع علمى يحبوا الوزير شوية انا بجد متغازة اوى من التعليم عندنا وانا شايفة اذا كان التعليم بتاعنا فاشل بيقى توابعة ببردو الفشل الزريععععععععععع

Anonymous said...

القرار ده يا عمرو ولا فى صالح علمى علوم ولا فى صالح علمى رياضة ولا فى صالح العملية التعليمية كلها، لأن الكليات الرياضية تحتاج الى الرياضيات بالدرجة الاولى وبعدين مناهج الثانوية العامة بصفة عامة لا توهل الطلبة للكليات ده، فما بالك بالطلبة اللى ما درسوش من الاساس، هما تقريبا لاقوا ان العملية التعليمية فى مصر بتطلع فى الروح ولسة فيها شوية نفس فقالوا نجيب من الاخر ونخلص عليها مرة واحدة

نقطة مية said...

هي الطلبة ناقصة لخبطة!!؟

دي سياسة تكسير الاحلام المهم في البلد دي محدش يعمل اللي هو عايزه..من الشعب طبعا..بداية من الطلبة الغلابة

ربنا يستر

Amr Mohy said...

ماهى دى سياسة بلدنا .. نطلع قرار مرة واحدة ونشقلب حال الناس ونخليهم يشدوا فى شعرهم ويضربوا كف على كف .. ومرة تانية نلغى القرار وكل شئ يرجع لأصله .. هى دى بلدنا فعلا

Amr Mohy said...

منه:
يعنى اللى درس كيمياء وفيزياء ورياضة اتنين بتوع ثانوية عامة خلاص بقى مؤهل انه يدخل هندسة وحاسبات .. لا طبعا بس ده نظام مفروضين عليه اسمه مكتب التنسيق ومن خلاله بيقول دارس رياضه 2 تبقى مهندس مش دارس رياضة اتنين تبقى مدرس

Amr Mohy said...

بحبك يا مصر :

طب لما يخلصوا عليها هيحصل ايه بعد كده .. هيقفلوا مدارس ثانوى كلها ونقضيها نظام من منازلهم ؟

عندنا عشان نحل مشكلة نعمل قرار بس القرار ده يعمل 10 مشاكل غير المشكلة الاولى ... حاجة غريبة قوى

Amr Mohy said...

نقطة ميه :

والله عندك حق مفيش ناس غلابة اكتر من الطلبة .. هم دول ابطال مصر فى وقت السلم

saloma said...

يابنى تلاقى الموضوع إن بنت واحد مسئول كبير دخلت علمى علوم و وهى فآخر تالتة طلع فدماغها تدخل هندسة، و بس تدخل الهندسة و بعدين يشيلوا القرار تانى سنة
عادى يعنى ماتحطش فبالك، هى أول مرة يعنى
شيل التحسين ، حط التحسين، اعمل امتحان انترفيو لإعلام ، شيل النترفيو، على درجات التعيين قللها
اتعودنااا خلاص

Ayman Elsherbiny أيمن الشربيني said...

كله محشي وتمر هندي، سيبك انته، مصر بخير وكل القرارات اللي بتصدر، بتكون نتاج جهد وبحث علمي دقيق!!

Amr Mohy said...

saloma :

ليكى حق ولاد المسئولين الكبار دول شكلهم هم اللى هيخربوا البلد اكتر ما هي خربانه

نورتينى بالزيارة

Amr Mohy said...

sherbiny :

ايوة فعلا القرارات اللى بتصدر بتكون نتاج جهد وبحث علمى دقيق هدفه كيفيه قرف المواطنين فى عيشتهم واصابتهم بالعته والبلادة

اسعدتنى بزيارتك :)

bakar said...

الخبر ده يا شاب مصرى ما هو إلا حلقة فى سلسلة التخبط فى صناعة القرار,بداية من نظام تعليم محدش بيتعلم منه حاجة, مرورا بمكتب تنسيق عقيم ولا يقيم فعلا قدرات الطلبة فى الإلتحاق بالكليات دى,و نهاية بملايين الشباب خرييجى الجامعات اللى مش لاقى شغل و بيعانى من هوة بشعة بين الدراسة و مجال العمل

Amr Mohy said...

bakar :

اخر الكلام لحد دلوقت ان القرار ده مش هيطبق العام الحالى مراعاة لمبدأ تكافؤ الفرص ... يومين كمان وهنسمع عن رفض الفكرة وإلغاء القرار .. فعلا احنا نعشق التخبط فى القرارات

لــــيــــالـــــــى said...

انا ضيفة جديد اذا اردت صداقتى ستذيد حياتى سعادة واذا رفضت ستسعدنى مجرد زيارتك

Anonymous said...

MARIAM
ممكن كانو عايزين يلحقو اللى زىاختك جابت مجموع عالى فى علمى علوم وملحقتش كليه علميه ..قالو يلحقوهم بكليه على قد المقام ..بس المشكله ان العدد المطلوب فى الكليات دى كل سنه هيفضل زى ما هو والاقبال هيزيد الضعف تقريبا.. يعنى التنسيق كله هيلعلع دول يصعبو عليك هيتظلمو مش تحس ان انت اللى اتظلمت

طلب اخير بس :ياريت تلحق ليالى وتزيد سعادتها وتقبل استضافتها

صاحب البوابــة said...

بالفعل

ولا عزاء للطلبة

تحياتي لك عزيزي

Amr Mohy said...

mariam :

معتقدش انهم عشان ينقذوا مجموعة طلاب يجيوا على حق طلاب زمايلهم .. مفيش كده تكافؤ فرص لو تم تطبيق القرار


صاحب البوابة :

هيفضل لامتى الشعار ده مرفوع .؟؟؟

شكرا لزيارتك :)

Dina Samaha said...

والله انا لما قريت كلامك فعلا حسيت بظلم,, ذنبها ايه الناس اللى مساعدهاش مجموعها قبل كده انها تدخل الكليات دى ودلوقتى جايين يطلعوا بقرار ساذج زى ده
طيب ما بدل ميخلوا اللى مش عارف حاجة عن الرياضيات وكل دارسته كانت عن العلوم يدخل هندسة ما يقللوا درجات طب وصيدلة اهو على الاقل يدخل حاجه هو فاهم فيها بدل ما فى الاخر يدخل كلية أداب يا تجارة
والله يا بنى على راى ايمن الشربينى كله بقى محشى (بتنجان) وتمر هندى !!!

تائهة فى أرض الأحلام said...

ايه ياعمرو
الواحد حس من كلامك انك متاثر أوى وكأنك كنت بتفكر لو القرار ده كان بدرى شوية كان زمانه دخلك الهندسة
واحمد ربنا الاعلام دلوقتى بقى أحسن من مليون دكتور ومهندس
على الأقل الفرص كتيرة والموهوب فعلا بيوصل فيه
وفلوسه أكتر
نصيحة ليك روح كل كشرى فى فلفلة بتاع ميدان العباسية
هاتلاقى الواد اللى هناك خريج كلية هندسة القاهرة
واحمد ربنا ان القرار ده ماجاش بدرى

Amr Mohy said...

dina samaha :

طب هو كل يوم محشي وبتنجان .. مفيش مرة صينية بطاطس باللحمة حاجة كده تفتح النفس :)


تائهة فى ارض الاحلام :

طبيعي انى اتأثر مهما كان ده كان حلمى وحلم والدى ووالدتى وكل ده راح بسبب نظام تعليم فاشل وبدل ما تطلع قرارات تغيير شامل تصلح الثانوية اللى اصابها السوس , بنلاقى قرارات لتعديل وضع على حساب وضع تانى وبالتالى العملية تخرب اكتر واكتر

Anonymous said...

سلام عليكم
اول حاجة مبروك يا عمرو على البلوج الجامد والمواضيع الاجمد
انا كمان كنت علمى رياضة وجبت 89% ودخلت اداب اعلام لكن انا دلوقتى مش ندمانة على الكلية مع انى دخلتها وانا مبحبهاش بس الواحد بعد كده اكتشف ان الكوسة اللى فى بلدنا لا بتقدر المهندس ولا بتاع الانابيب لكن المشكلة يا عينى فى طلبة ثانوية عامة اللى المجتمع كله محسسهم ان هى طب وهندسة وبس وباقى الكليات ياى بتاعت الناس الفاشلين طبعا القرار ده حيجنن المجاميع اكتر ماهى مجنونة وحيحبط الطلبة اكتر ما هى محبطة والقرار طبعا فى صالح الكليات الخاصة لان عدد الطلبة حيزيد فى كل الكليات اللى بيسموها القمة واهو كله على قد فلوس بابا ومتنساش تسلملى على اصلاح التعليم

Amr Mohy said...

mena:

هو فعلا دلوقتى كل زى بعضه دكتور = دبلوم واللى معاه صنعة يغلب اللى معاه شهادة

بس مهما كان في فعلا ناس بيحلموا بالطب وبالهندسة بعيد عن ضغوط ورغبات الاهل ونظرات المجتمع عن كليات قمة مش قمة وحرام نضيع الحلم ده بسبب نظام فاشل يعتمد على مجموعك كام


شكرا يامنه على زيارتك