Wednesday, May 16, 2007

البلاي استاشن ولحــس العقول


انت رايح فين يابنى مع صحابك .. سؤال تقليدى شبه يومي والاجابة المعتادة هي نازل العب بلاي استاشن مع الشلة صحابي ... فيكون رد الفعل انه ازاى راجل شحط عنده 21 سنة لسه رايح يلعب اتارى زي الاطفال فى الابتدائي
أعتقد أن سر إعجاب وتعلق الشباب بجهاز البلاي استاشن انه بيعيشهم حلم مقدروش يحققوه وهو أن يكونوا متميزين فى حياتهم في اى مجال خاصة الرياضة وكرة القدم سواء كانوا لاعيبة كرة قدم جامدين وملهومش حل وصحاب مهارات فردية زي مارادونا وابو تريكة وكمان الفراغ الكبير اللى بيشعر به ابناء جيلي جعلهم يبحثون عن وسيلة لقتل هذا الفراغ فمنهم من لجئ للحشيش عشان ينسي ومنهم من لجئ للبلاي استاشن عشان يتسلي ومنهم اللى لجئ للحشيش والبلاي استاشن لان الفراغ زيادة عنده ... طبعا لا انا لعيب كرة جامد ولا حاجة بس عندى فكر كروى بحققه وأنفذه فى ملعب البلاي استاشن وده بيحسسنى انى أعظم مدرب ولاعب كروى ظهر فى تاريخ البشرية .
قعدة البلاي استاشن ليها طقوسها تختلف من مجموعة أصدقاء لآخري .. فمثلا فيه ناس ميعرفوش يلعبوا من غير سجاير والحاجة الساقعة .. مجموعة تانية لازم يكون الجو المحيط يسوده الهدوء .. مجموعة تالتة لازم يكون المكان مليان دوشة وأغانى .. مجموعة رابعة تتمسك بالتلفزيون صاحب 29 بوصه او اكتر ويكون صوت المعلق عالى ... ومجموعة لازم يكون معاهم حشيش عشان يلعبوا وهم مهيسيييين لكن الشئ المشترك بين المجموعات المخلتفة لازم تكون ذراعات البلاي استاشن شغالة وسليمة 100 % عشان يعرفوا يلعبوا صح وبمزاج ... خلال القعدة بنلاحظ تحول كبير فى الشخصيات والعقل الباطن يصبح هو السائد والمسيطر فمثلا الشخص الهادى والرزين فى الحياة العادية واليومية يتحول لشخص عصبي يشتم اى لاعب يضيع فرصة سهلة او ي ويتخانق مع صاحبه .. أما الشخص العصبي فى الحياة العادية يتحول لحمل وديع يأخذ فرصة قعدة البلاي استاشن للاستمتاع والابتعاد عن ضغوط الحياة واللى ميشربش سجاير بقى بيشرب وغيرها من التحولات النفسية التى لا يصدقها عقل
تأثير قعدة البلاي استاشن من الناحية الاقتصادية علي جيوب الشباب يفوق تأثير شراء 3 علب سجاير كليوبترا يوميا علي حد علمي لانى مش بشرب سجاير .. فالمتوسط لكل فرد امام جهاز البلاي استاشن 4 لــ5 ساعات وده يتكلف حوالى 15 جنيه على الاقل .. منين بيجيب الشاب المبلغ ده اكيد من مصروفهم او من مرتباتهم وفى كلتا الحالتين بيوصل بيهم الحال فى اخر الشهر مفلسين وجيبهم فاضي بس ده ميمنعش انهم يلعبوا شكك لغاية ما يقبضوا اول الشهر الجديد بس المهم التجمع الاستشانى لا يتوقف .. ده غير اللعب على فلوس والدورات اللى بتتعمل كل فترة بين اجمد ناس فى لعبة كرة القدم بلاي استاشن خاصة فى شهر رمضان وفى الاعياد
الجديد بقى ان البلاى استاشن كجهاز بقى جزء من عفش البيت يعنى الشاب لما يتجوز يقول انا لازم اجيب الشقة ويكون فيها البوتاجاز والتلاجة والتلفزيون والدش وووووو واهم حاجة طبعا البلاي استاشن .. طبعا مش هيلاعب مراته بلاي استاشن لان الست مش فاضية او متعرفش تلعب فهيكون أصدقاء طفولة العريس ضيوف دائمين فى شقة الزوجية .. والست يعينى محبوسة فى الاوضة مستنية قرار الافرج عشان كده لازم على فتاة مقبلة على الزواج انها تاخد كورسات ودورات تقوية فى كيفية ممارسة البلاي استاشن والا سيكون مصيرها الحبس فى المطبخ او الاوضة بين اربع حطان .. وقد حذر من أنذر
عالم البلاى استاشن عالم كبيـــــــــــــــــــــــر ... زمان كان الشباب بيقعدوا على القهاوى يلعبوا كوتشينة وطاولة وشطرنج والدومناه دلوقت محلات البلاي استاشن اصبحت ملتقى الشباب واصبحت القهاوى موضه قديمة

5 comments:

Anonymous said...

أنا بكرة ألعاب البلاى استاشن وبتخنق منها، مش عارفة اللى بيلعبوها دول بيلعبوها ازاى

بس فعلا البلاى استاشن ده بقى مشكلة حاجة كده عاملة زى الادمان ده مش للشباب بس أنا عندى ولاد خالتى اللى مكملوش عشر سنين تقريبا لاجين فى محلات البلاى استاشين، بجد مش عارفة ايه اللى بيجذبهم ليه

Amr Mohy said...

االبلاي استاشن مش مقصور على الشباب بس ده فيه بنات بتحب جدا اللعب على الجهاز ده .. فالجهاز بمجرد لما تقعدى عليه بيخطفك من العالم الواقعى وينقلك لعالم جديد خيالى تحققى فيه كل اللى انتى تحلمي بيه فانتى بتكونى البطلة والنجمة والعالم كله متوقف على تصرفاتك ونجاحك فى اداء مهمتك .. طبعا ده بيشد ناس كتير شباب وبنات لانهم فى الواقع مش لاقيين شئ مفيد يمارسوه غير قعدة البيت او القهاوى

البلاي استاشن اصبح متنفس الشباب ووسيلة لقتل الفراغ والزهق ... زمان كانوا يلعبوا طاولة على القهوة دلوقت بيلعبوا جيمز

Anonymous said...

ana b2aly kter awy awy ml3btesh playstation bs tsdk ya 3amr 7`leto ew7shny gdn ana zman kont b7b awy al3b l3bet super mario

Amr Mohy said...

كلنا اتربينا علي لعبة سوبر ماريو ولعبة صيد البط وغيرها وغيرها ايام الاتارى :)

Anonymous said...

to7fa bgad el mawdo3 dah ..... gamed a5er 7agaaaaa... yatara kan meen elli fi balak wenta btektebo ;D heheheheheheeee