خلصت ايام الجامعة بذكرياتها الحلوة والمرة , ناس كتير كنت متعود اشوفهم وانا بتمشي فى الجامعة جه الوقت ومش هشوفهم تانى , القعدة المفضلة فى ارض المدرج وقت محاضرة الدكتورة سوزان بقيت مجرد ذكرى , لمة الاصحاب حوليا بين المحاضرات ووقت المحاضرات وانىتتكلم مع ده شوية وأهظر مع ده وأتخانق مع غيره ونهييس مع بعضينا راحت ايامها , قعدة المذاكرة الجماعية مع صحابي مش هتتكرر
حاجات كنت متعود اعملها خلاص كلها بيقيت ذكرى لكن يبقى الامل فى انى افضل على اتصال بكل اصدقائي اللى بجد قضيت معاهم احلى ايام حياتى وصدق اللى قال ايام الجامعة متتعوضش .. عارف ان كل واحد هينشغل بحياته فالدنيا تلاهي لكن مهما الدنيا شغلتنا هتفضل الايام الحلوة رابط قوي يجمعنا من الوقت للتانى
انا فعلا متعلمتش الا اشياء بسيطة جدا من دراستى فى الجامعة لكن كسبت مجموعة اصدقاء مش هيتكرروا لاننا عرفنا و حبينا بعض بجد من غير نفاق ولا معرفة مصلحة وغيره من العلاقات اللى هنكتشفها فى الحياة العملية
22 comments:
هاى
الى صديقى الصدوق عموره
انا كمان مضايقة اوى اوى اوى
اننا خلاص مش سهل نشوف بعض تانى زى الاول وكل يوم وكل الاوقات الحلوة والوحشة وكل انواع الاوقات مع بعض وانا متاكدة ان كل واحد فينا خلاص هيبقى ليه حياته المستقلة واننا ممكن مش نكلم بعض او نشوف بعض بس بجد النت دة جامد جدا واكتر حاجة انا حاسسة انها هتربطنا ببعض على طول ان شاء الله
وانا عاوزة اقول حاجة بجد ليك يا عموره ولكل اصحابى انهم بجد هيوحشونى موت تتتتتتتتتتتتتتتتتتتتتتت وهقول حاجة واحدة بس فى الاخر اتمنى انها تحقق
يا رب تدوم ايامنا سوى ويبقى على (طول جمعنا الهوى والحب
يا رب
منون
هالو يا عمورة يا احلى صديق فى الدنيا كلها بجد
كلنا مستغربين الجو الجديد ده وحاسين ان ايام الهزار راحت وجيه وقت الجد وده فى حد ذاته حاجة تدايق وتقلق بس اللى يدايق اكتر ان انا مش متخيلة ان الدراسة حتيجى ومش حننزل الجامعة ونشوف بعض تانى انا اخر يوم كنت ببص على كل حاجة فى الجامعة وكل الناس الناس اللى قربت منهم اوى والناس اللى كل يوم كنت بقف معاهم 5 دقايق نسلم على بعض وندردش شوية وحتى الناس اللى اعرفهم بالشكل بس كل دول حاسة انهم حيوحشونى اوى والمحاضرات كمان حتوحشنى وبالذات محاضرات د.سوزان يمكن عشان كنا بنتجمع فيها كلنا كل حاجة فى ايام الجامعة حتوحشنى حتى المذاكرة يا اخى حتوحشنى بس زى ما منون قالت النت ان شاء حيفضل مجمعنا وان شاء الله حنتقابل دايما لان بجد انا مكنتش ححب الجامعة من غيرك يا عمرو انت ومنة وكل صحابناوبجد نفسى ربنا يوفقنا كلنا فى حياتنا كلهاوكل واحد يحقق الحاجة اللى نفسه فيهاواشوفكوا كلكوا على خير ان شاء الله
menna ahmed
أكبر مكسب لينا فعلا من الجامعة هو الأصدقاء، حاول دايما تفضل على اتصال بيهم لأنك حتتعب على ما تلاقى حد زيهم ويمكن ما تلاقيش خالص، الناس الحلوة ده بقت عملة نادرة علشان كده حافظ على صداقتهم
MARIAM
يا عمرو من احلى ايام عمرنا ايام الجامعه اللى اتلميناكلــــــــنا مع بعض من مواقف كتير محاضرات امتحنات ضحكنا وهزرنا كتيييير اوى عمرنا ما هننساها...بس مش معنى انها عديت ان احنا كمان صداقتننا هتعدى ..يمكن نتاخر شويه على بعض فى السؤال كل واحد بظروفه خاصة البنااااات ..اللى هتتخطب من هنا هتتخطف من هنا واظن انت جربت الموقف ده معانا ..ويا سلااام بقى على اللى هيشتغل وينسى اهله مش بس اصحابه..عمرو احنا اصحاااب ومش هنبعد ان شاء الله ..بس صحيح لسه حفلة المشاريع هنتجمع كلنا تاانى
و لسه كمان مع النتيجه ان شاء الله نتقابل وننشكح جمعاااااااااااء
المهم محدش ينسى حد وربنا يوفقنا كلنا كل واحد فى حياته وفى شغله ويجمعنا دايما ياااارب
انا شايفة انك كدة استفدت من فترة الكلية اقصى استفاده و ده هوه المطلوب على فكرة.محدش بيتعلم نظرى منها خالص ف حتعمل ايه غير انك يكون عندك أصحاب منها؟؟
3amr bsra7a ana z3lana awy 3la ayam el gam3a deh w 7`sosn enha bgd kan bt7lw aktr f el a7`r w kolna bn2rb mn b3d aktr w aktr akn s3ban 3lena enna nseb b3d f wa2t 2oreb
ayam tgnn fr7na w dd7kna w t3bna w z3lna w 7drna mo7adrat w 3mlna kol 7aga m3 b3d bgd
aktr 7aga bstany eny 3rft nas kolha mo7trma w kowesa w 7betko awy bgd
w isa ya 3amr hnfdl as7ab m,hma kant el zrof zy ma etf2na 2bl kda w zy ma mariam 2alet lsa feh el ntega wel 7fla bta3t el t7`rog
w el modo3 mesh bs 3la kda lazem ns2l 3n b3d kol shewea isa kol ftra 3shan ana mesh 3aeza a7lm awy n7`lena wake3en w ns2l 3n b3d kol shewea ya gma3a w blash nnsa b3d mhma kant el zrof
3la fekra a7`r comment dah kan bta3y im eman ya gma3a
منون :
هو فعلا النت وسيلة مرنة تساعدنا اننا نتصل ببعض بشكل مستمر .. بس مش معنى كده اننا منتقابلش ولا نسمع اصوات بعضينا
menna ahmed :
والله يا منه الكلية بقيت احلى في عنينا وقت الامتحانات حتى الشجر اللى دايم نشوفه من غير ورق كان لونه اخر ومليان ورد احمر .. كل الناس كانت بتتصور مع بعضها وناس كتير عرفوا بعض اخر الايام مع ان الاربع سنين كانت قدامهم ... المهم نفضل على اتصال ببعض ونعرف ايه اخر الاخبار
بحبك يا مصر :
فعلا وقت الجامعة هو انسب وقت لتكوين الصداقات لانا وقتها بنكون لسه نضاف مطبعش علينا الصراعات اللى هنشوفها فى الحياة العملية ومعرفة المصالح والتكتلات ضد الاخرين
ربنا يستر علينا
mariam :
ان شاء الله يا مريم نفضل على اتصال دايما .. دقيقة مكالة بالتليفون تكفى اننا نطمن علي بعض من وقت للتانى
queen eraser :
هو فعلا التعليم فى الجماعة واقع بشكل بشع اللى بندرسه حاجة والعملى حاجة تانية خالص ... اهم حاجة اتعلمناها ازاى نتعامل مع الشخصيات المختلفة وفى المواقف المتنوعة
eman :
ايام الجامعة مش هتتعوض وهنفضل طوال فترة حياتنا نفضل نحكي لاهلنا واصحابنا واولادنا ان شاء الله عن ذكراياتنا ومواقفنا الحلوة مع بعض ... ويارب نفضل دايما عارفين اخبار بعض
انا برضو حاسة بشئ جديد عليا هو اننا بقينا فى اجازة مدى الحياة وليس امامنا الا ان نبحث عن عمل بس ايام الجامعة مش هنقدر نعوضها تانى الا اذا كان لينا نصيب نشتغل فى مكان كويس يكون اللى فيه بجد زى الاصدقاء واخوات مع بعض مش امور بقى خبى لحسن ياخد فكرتك
بس انا معرفش انت مين يا عمرو ؟
مدونة جميلة
وموضوع رقيق
تحياتي
اهلا بك في معركة البحث عن الذات..بس نصيحة..اصدقائك دول حافظ عليهم مش هتلاقي زيهم تاني بذكرياتك معاهم
تحياتي
فعلا الاصدقاء هما المكسب الحقيقى فى الفترة اللى بنعيشها فى الكلية
واللى اتخرج مين غير اصدقاء فعلا خسر كتيييير لانه عمره ماهيقدر يكون صداقة زى الفترة دى ولا يعيش جمالها مع الناس اللى عرفها وحبها ايام الجامعة
ربنا يجمعك دايما على خير بيهم وتتلاقوا على طول فى الحياة بس انت مهما انشغلت اوعى تقصر فى حقهم واوعى تاخدك الدنيا منهم
شاب مصري
بصراحة معاك حق بكلم كلمة بتحكيها
انا لغاية دلوقتي مش مسدق اني لما اتخرج هسيب صحابي الي وقفو معايا اجمل ايام حياتنا
للاسف عمري ما سمعت صداقة بالشغل
فربنا يستر
البوست كتير بيجنن يا شاب مصري
وتعيش وتفتكر
السلام عليكم ورحمة الله وبركاته..،
وهو إيه في حياتنا مش بيتحول ألبوم ذكريات وكأن أمبارح بس دخلت الحضانة وكأن من أمبارح بس دخلت المدرسة وكأن من أمبارح بس خرجت من المدرسة ودخلت الجامعة وكأن من أمبارح بس أتعرفت على أصحابي وكأن من أمبارح بس ودعتهم في حفل وداعهم في سنة رابعة وبكرة أصحابي الآخرين أودعهم ولكن تبقى بيننا الذكرى وصورنا وإحنا بالضفاير وبنغني وبنحلم نكون ماما نجوى أو مضيفة طيران وبنطنطت وبنلعب أولى وبنحلم نكبر وأدينا كبرنا وموجودين فينا دلوقتي بكرة اللحظة دي لحظة كتابتي وتعلقي في مدونة صورة تكون ذكرى...
أيام بتجري رهوان الفرح فيها دقايق والحزن فيها ساعات.. ويبقى آمالنا أن ندخل الجنة حيث نعيم مقيم دون أن تتحول ذكريات..
جزاكم الله خيرا.. موضوع جميل أوي بيشدنا لحنين الذكريات
بعد ما كتبت تعليق طويييل عريض اختفى..يااالا خير نكتب تاني
ــــ
الموضوع ده بيشدنا إلى حنين الذكريات الطفولة في الحضانة والمدرسة واللعب والجري والغنا والأحلام ولعبة الأولى والحبل كلها بقت ذكريات بس هي على بالي كأنها حصلت أمبارح ليس أبعد من ذلك.. أيام بتمر وتحولات كتير في حياتنا بتحصل بنفضل نفكر ونقول يااااه أحنا كنا بنعمل كدة يااااه دي كانت أيام جميلة ومكناش حاسين بيها..
فلازم نعيش يومنا ونحس بجماله حتى لو في مرارة هتبقى ذكريات ونقول إحنا أتعلمنا من المشكلة دي وعدينا منها واستفدنا وبقت في ألبوم ذكرياتنا..
وامبارح زي ما ودعت سنة رابعة بكرة يودعوني سنة أولى وتانية وتالتة.. فاكرة أول يوم في الجامعة وشريط الذكريات بيعدي في لحظة سبحان الله
وبالنسبة لأصحابنا ممكن نعمل حاجة جميلة إننا نتقابل كل شهر إحنا فعلا بنعمل كدة بنتقابل أول كل شهر نتغدى مع بعض والجميل بقى إن كل أصحابي دول متعرفة عليها من النت في منتدى دخلناه مع بعض وسبناه قدرًا مع بعض وعملنا كلنا مدونات بردوا من غير قصد
فكرة حلوة عشان نعرف أخبار بعض..
يااااه أنا طولت ورغيت.. موضوع حضرتك جميل ماشاء الله
alia :
هو ميزة الجامعة ان اصحابك مكنش فيها جزئية المنافسة لاثبات النفس امام رئيس العمل او المدير فكانت النفوس صافية وكنا بنحب بعض بعض عشان كده اصحاب الجامعة عمرهم ما هيتعوضوا
اما زملاء العمل خاصة لو شباب فى سنك لازم هيكون في سنة غيرة وحقد وكلمة اشمعنى بالتالى مش كل اصحابك اللى هتعرفيهم هيكونوا بيحبوكي بجد بس مدعين الحب رغبة فى تحقيق هدف معين
اى نعم مش كل اللى هتعرفيهم كده اكيد فيه ناس كويسة بس فى الزمن ده الكويس عملة نادرة .. ربنا يستر
مش فاهم انا مين ازاى ؟
dr-killer:
مانقدرش نقول الا ان دى هي عجلة الحياة فى تغيير مستمر لازم تتعرف علي ناس مختلفة وجديدة طالاما انت عايش وفرد فى المجتمع لكن شطارتك تتوقف على انك تقدر تختار الاصدقاء وتحافظ عليهم
شروق الشروق :
حياتنا فعلا البوم كبير مجرد ما تفتحي الالبوم ده تلاقي شريط الصور بيعدى من قدامك وتفتكرى لحظة كل صورة ولا كانها امبارح .. فعلا الايام الحلوة بتجرى
Post a Comment